പഠിക്കുന്നത് എങ്ങനെ ?

പ്രസിദ്‌ധമായ ഈ കവി വചനത്തിന് ഒരു അനുബന്ധമുണ്ട്:

“പഠിക്കുകയേ വേണ്ട, ജയിക്കണം.”

പണം കൊടുത്താൽ ഏതു ബിരുദവും ബിരുദാനന്തര ബിരുദവും നേടാമെന്നും, നോട്ടുകെട്ടിന്റെ തൂക്കത്തിൽ മത്സരപരീക്ഷകൾ കടന്നു കയറാമെന്നുമുള്ള വിശ്വാസം യുവതലമുറയെ ഒട്ടൊന്നുമല്ല വഴിതെറ്റിച്ചിട്ടുള്ളത്.

തൊഴിൽ നേടാൻ, ജീവിതവിജയം നേടാൻ നോട്ടുകെട്ടും ശുപാർശയുമായി ഓടുന്നവർ മെനയുന്ന കഥകൾ അനവധിയാണ്.  ഇത്തരം കഥകളിൽ വിശ്വസിക്കുകയും തന്റെ മടിശ്ശീലയ്ക്ക് കനമില്ലല്ലോ എന്ന ദുഃഖത്തോടെ നിരാശയിലാണ്ടു പോവുകയും ചെയ്യുന്നവരിൽനിന്ന് വിഭിന്നമാണ്‌  നേട്ടങ്ങൾ കൈയ്യടക്കിയവരുടെ വിജയചരിത്രം.  നമുക്കിടയിൽ നിന്ന് ജീവിതവിജയം കൈവരിച്ചവർ; ചരിത്രത്തിന്റെ ഏടുകളിൽ തിളങ്ങി നിൽക്കുന്നവർ ഉയരങ്ങൾ കീഴടക്കിയത് നോട്ടുകെട്ടിന്റെയും ശുപാർശയുടെയും പിൻബലത്തിൽ അല്ല.  ഇത്തരം വ്യക്തികളെ കണ്ടെത്താൻ ചരിത്രത്തിൽ ഏറെ പിന്നോട്ടു പോകേണ്ടതില്ല.  കേരളത്തിലെ ഒരു ഉൾനാടൻ ഗ്രാമത്തിലേക്ക് ഐ. എ. എസ്. കൊണ്ടുവന്ന വി.പി.ജോയിയും, യാതനയുടെ വഴികളിലൂടെ അഖിലേന്ത്യാ സിവിൽ സർവ്വീസിലെത്തിയ വിജയനും ഇത്തരക്കാരാണ്.  ഇവരുടെ കഥകൾ കരിയർ മാഗസിനിലൂടെ നിങ്ങളിലെത്തിയിട്ടുമുണ്ട്.  കടുത്ത ആത്മവിശ്വാസമാണ് അവരെ ഉന്നതങ്ങളിലെത്തിച്ചതെന്നതിന് രണ്ടുപക്ഷമുണ്ടോ?

   ഇനിയും നിങ്ങൾക്കു വിശ്വാസമാകുന്നില്ല, അല്ലേ ? ” ഓ – ഇതൊക്കെ എത്രയോ കേട്ടതാ!” എന്ന ഭാവം ഇപ്പോഴും നിങ്ങളിൽ നിലനിൽക്കുന്നുവെങ്കിൽ  ഒരു കാര്യം ഉറപ്പായി പറയട്ടെ, തെറ്റായ ധാരണകൾ നിങ്ങളുടെ ജീവിത വിജയത്തിനുള്ള സാദ്ധ്യത 25 ശതമാനമാക്കി ചുരുക്കിയിരിക്കുന്നു.  ജീവിതത്തിൽ വിജയിക്കുവാൻ ഇപ്പോഴെങ്കിലും നിങ്ങൾ ആഗ്രഹിക്കുന്നു എങ്കിൽ അതിനുള്ള അവസരം നിങ്ങൾതന്നെ സൃഷ്ടിക്കേണ്ടിയിരിക്കുന്നു.  കവലയിൽ വെടിപറഞ്ഞിരിക്കുന്ന നിങ്ങളെ കൂട്ടിക്കൊണ്ടുപോയി, നിങ്ങൾക്കിഷ്ടപ്പെട്ട ജോലിയും ആവശ്യത്തിലേറെ പണവും നൽകുവാൻ ആളില്ല  എന്നറിയാമല്ലോ? നിങ്ങളുടെ അവസരങ്ങൾ നിങ്ങൾ കണ്ടെത്തേണ്ടതുണ്ട്.  അതിനായി പരിശ്രമിക്കേണ്ടതുണ്ട്.

     വളരെ പ്രശസ്തനായ ഒരു ചിന്തകനോട് ഒരിക്കൽ ഒരാൾ ചോദിച്ചു: “എന്നെ ഒരു പെൺകുട്ടിയും പ്രേമിക്കുന്നില്ല.  ഞാനെന്താണ് ചെയ്യേണ്ടത്?”

     “അതിനുള്ള ‘അവസരം’ നീ സൃഷിക്കുക!” ചിന്തകൻ മറുപടി പറഞ്ഞു.

     അവസരങ്ങൾ നാം തന്നെ സൃഷ്ടിച്ചേ മതിയാകൂ.  ഒരു പക്ഷേ അത് നമ്മെ തേടിയെത്തിയേക്കാം.  അത് അപൂർവ്വമായി മാത്രം. ‘ചക്കവീണ് മുയലു ചാകും പോലെ.”  അവസരങ്ങൾ സൃഷ്ടിക്കുന്നവരാണ് യഥാർത്ഥ വിജയശില്പികൾ.  ലോകത്തെ വരുതിയിൽ നിർത്തിയ നെപ്പോളിയൻ തന്റെ യുവസൈനികർക്കു നല്കിയിരുന്ന ഉപദേശം ഇതായിരുന്നു.  “നഷ്ടപ്പെടുത്തുന്ന ഓരോ മണിക്കൂറും ഭാവിയിൽ നിങ്ങളുടെ ദൗർഭാഗ്യത്തിന് ആക്കം കൂട്ടും.  അതിനാൽ നിങ്ങൾ നിങ്ങളുടെ അവസരങ്ങൾ വർധിപ്പിക്കുക.”