അപേക്ഷ ക്ഷണിച്ചു

സംസ്ഥാനത്തെ സഹകരണസംഘം ജീവനക്കാരുടെ കേരളാ സ്റ്റേറ്റ് കോ-ഓപ്പറേറ്റീവ് എംപ്ലോയീസ് വെൽഫെയർ ബോർഡിൽ അംഗങ്ങളായവരുടെ മക്കളിൽ 2018-19 അധ്യയനവർഷത്തിൽ എസ്.എസ്.എൽ.സി, പ്ലസ്ടു, വി.എച്ച്.എസ്.ഇ, എച്ച്.ഡി.സി&ബി.എം, ജെ.ഡി.സി പരീക്ഷകളിൽ സംസ്ഥാനതലത്തിൽ ഉയർന്ന മാർക്ക്/ഗ്രേഡ് കരസ്ഥമാക്കിയവർക്കും ബി.ടെക്, എം.ടെക്, ബി.എസ്.സി നഴ്‌സിംഗ്, ബി.ഡി.എസ്, എം.ബി.ബി.എസ്, ബി.എ.എം.എസ്, ബി.എച്ച്.എം.എസ്, എം.എസ്, എം.ഡി, എം.ഡി.എസ് എന്നീ പ്രൊഫഷണൽ ഡിഗ്രി കോഴ്‌സുകൾക്ക് ജില്ലാതലത്തിൽ ഉയർന്ന മാർക്ക് നേടിയവർക്കും വിദ്യാഭ്യാസ ക്യാഷ് അവാർഡുകൾക്ക് അപേക്ഷ ക്ഷണിച്ചു.

കൂടാതെ സംസ്ഥാന സ്‌കൂൾ കലോത്സവത്തിൽ സെക്കൻഡറി/ഹയർസെക്കൻഡറി തലത്തിൽ ‘എ’ ഗ്രേഡ് കരസ്ഥമാക്കിയവർക്കും സ്‌പോർട്‌സ്/ഗെയിംസ് മത്സരങ്ങളിൽ സംസ്ഥാന തലത്തിൽ ഒന്ന്, രണ്ട് സ്ഥാനങ്ങൾ നേടുകയോ, ദേശീയതലമത്സരത്തിൽ പങ്കെടുക്കുകയോ ചെയ്ത സ്‌കൂൾ വിദ്യാർത്ഥികൾക്കും, അന്തർസർവകലാശാലതലത്തിൽ ഒന്ന്, രണ്ട്, മൂന്ന് സ്ഥാനങ്ങൾ നേടിയ കോളേജ് വിദ്യാർത്ഥികൾക്കും, എർപ്പെടുത്തിയിട്ടുള്ള ക്യാഷ് അവാർഡിന് അപേക്ഷിക്കാം.

സ്റ്റേറ്റ് ബോർഡ്, സി.ബി.എസ്.ഇ, ഐ.സി.എസ്.ഇ, ഐ.എസ്.സി എന്നീ സിലബസുകളിൽ പഠിച്ച് എസ്.എസ്.എൽ.സിക്ക് എല്ലാ വിഷയങ്ങൾക്കും എ+/എ1 ഗ്രേഡ് ലഭിച്ചവരുടെയും പ്ലസ്ടു വിന് 90 ശതമാനം മാർക്ക് നേടിയവരുടെയും അപേക്ഷകളാണ് ക്യാഷ് അവാർഡിന് പരിഗണിക്കുക. വി.എച്ച്.എസ്.ഇ, എച്ച്.ഡി.സി&ബി.എം, ജെ.ഡി.സി എന്നി വിഭാഗത്തിൽ സംസ്ഥാനതലത്തിൽ ഒന്ന്, രണ്ട്, മൂന്ന് സ്ഥാനങ്ങൾക്കും മറ്റ് പ്രൊഫഷണൽ ഡിഗ്രി കോഴ്‌സുകൾക്ക് ജില്ലാതലത്തിൽ ഏറ്റവും കൂടുതൽ മാർക്ക് നേടിയവരെയും പരിഗണിക്കും.

നിശ്ചിതമാതൃകയിലുള്ള അപേക്ഷാഫോമിനും വിശദ വിവരങ്ങൾക്കും അംഗ സംഘങ്ങളുടെ ഭരണനിയന്ത്രണചുമതലയുള്ള ജില്ല/താലൂക്ക് തലത്തിലുള്ള ഓഫീസുകളുമായോ എംപ്ലോയീസ് വെൽഫയർ ബോർഡിന്റെ തിരുവനന്തപുരത്തെ ഹെഡ് ഓഫീസ് (0471-2460339), കണ്ണൂർ (0497-2708370), തൃശൂർ (0487-2444266), എറണാകുളം (0484-2535693), തിരുവനന്തപുരം (0471-2460440) എന്നീ റീജിയണൽ ഓഫീസുകളുമായോ ബന്ധപ്പെടാം. കൂടാതെ www.kscewb.kerala.gov.in എന്ന വെബ്‌സൈറ്റിലും ലഭ്യമാണ്.

അപേക്ഷകൾ അയക്കേണ്ട വിലാസം: അഡീഷണൽ രജിസ്ട്രാർ/സെക്രട്ടറി-ട്രഷറർ, കേരള സ്റ്റേറ്റ് കോ-ഓപ്പറേറ്റീവ് എംപ്ലോയീസ് വെൽഫെയർ ബോർഡ്, പി.ബി. നമ്പർ-112, സംസ്ഥാന സഹകരണ ബാങ്ക് ബിൽഡിംഗ്, ഓവർബ്രിഡ്ജ് ജംഗ്ഷൻ, തിരുവനന്തപുരം-1.
അപേക്ഷ ലഭിക്കേണ്ട അവസാനതിയതി ജൂലൈ 31 വൈകിട്ട് അഞ്ചുവരെ.