വിദ്യാഭ്യാസ ധനസഹായം: അപേക്ഷ ക്ഷണിച്ചു

തിരുഃ കേരള കർഷക തൊഴിലാളി ക്ഷേമനിധി ബോർഡിൽ അംഗങ്ങളായിട്ടുള്ള കർഷക തൊഴിലാളികളുടെ കുട്ടികൾക്ക് 2025-2026 അധ്യയന വർഷത്തെ വിദ്യാഭ്യാസ ധനസഹായ ത്തിനുള്ള അപേക്ഷ ക്ഷണിച്ചു. സർക്കാർ/എയ്ഡഡ് സ്‌കൂളുകളിൽ വിദ്യാഭ്യാസം പൂർത്തിയാക്കി 2025-2026 വർഷത്തെ S.S.L.C/T.H.S.LC പരീക്ഷയിൽ 75 ഉം അതിൽ കൂടുതലും പോയിൻറ് നേടിയവരും PLUS TWO/V.H.S.E. പരീക്ഷയിൽ 85 ശതമാനവും അതിൽ കൂടുതലും മാർക്ക് നേടിയവരുമായ വിദ്യാർത്ഥികളുടെ മാതാപിതാക്കളിൽ നിന്നുമാണ് അപേക്ഷ ക്ഷണിച്ചിട്ടുള്ളത്. S.S.L.C/T.H.S.LC പരീക്ഷയിൽ 70 പോയിൻറും അതിൽ കൂടുതലും PLUS TWO/V.H.S.E പരീക്ഷയിൽ 80 ശതമാനവും അതിൽ കൂടുതലും മാർക്ക് ലഭിച്ച SC/ST വിഭാഗം വിദ്യാർത്ഥികളുടെ മാതാപിതാക്കൾക്ക് ജാതി സർട്ടിഫിക്കറ്റ് സഹിതം അപേക്ഷിക്കാവുന്നതാണ്. കർഷക തൊഴിലാളി ക്ഷേമനിധി ബോർഡിൽ അംഗങ്ങളായ മാതാപിതാക്കളിൽ നിന്നും നിശ്ചിത ഫോറത്തിലുള്ള അപേക്ഷ ബോർഡിൻറെ ജില്ലാ എക്സിക്യൂട്ടീവ് ഓഫീസിൽ ജൂലൈ 20 മുതൽ ആഗസ്റ്റ് 31 ന് വൈകിട്ട് 5 വരെ സ്വീകരിക്കും.

അപേക്ഷ ഫോറം www.agriworkersfund.org യിൽ ലഭ്യമാണ്.

അപേക്ഷയോടൊപ്പം മാർക്ക് ലിസ്റ്റിൻറെ സ്വയം സാക്ഷ്യപ്പെടുത്തിയ പകർപ്പ്, ട്രാൻസ്ഫർ സർട്ടിഫിക്കറ്റിൻറെ സ്വയം സാക്ഷ്യപ്പെടുത്തിയ പകർപ്പ് (സർക്കാർ/എയ്ഡഡ് സ്ഥാപനമാണോ എന്നറിയുന്നതിന്), അംഗത്വ പാസ് ബുക്കിൻറെ പകർപ്പ്, ആധാർ കാർഡിൻറെ പകർപ്പ്, ബാങ്ക് പാസ് ബുക്കിൻറെ പകർപ്പ്, റേഷൻ കാർഡിൻറെ പകർപ്പ് എന്നിവ സമർപ്പിക്കണം. കൂടുതൽ വിവരങ്ങൾക്ക് കർഷക തൊഴിലാളി ക്ഷേമനിധി ബോർഡിൻറെ ജില്ലാ ഓഫീസുകളുമായി ബന്ധപ്പെടാം.