പോളിടെക്‌നിക് പ്രവേശനത്തിന് ഇപ്പോൾ അപേക്ഷിക്കാം

2018-19 അധ്യയന വര്‍ഷത്തേയ്ക്കുള്ള സംസ്ഥാന പോളിടെക്‌നിക് പ്രവേശനത്തിന് ഇപ്പോൾ അപേക്ഷിക്കാം. സംസ്ഥാനാടിസ്ഥാനത്തിലാണ് പ്രവേശനം. ഒരു വിദ്യാര്‍ത്ഥിക്ക് 30 ഓപ്ഷനുകള്‍ വരെ നല്‍കാം. www.polyadmission.org മുഖേന ഓണ്‍ലൈനില്‍ അപേക്ഷ സമര്‍പ്പിക്കണം.

എസ്.എസ്.എല്‍.സി/ടി.എച്ച്.എസ്.എല്‍.സി/സി.ബി.എസ്.ഇ-എക്‌സ്/മറ്റ് തുല്യ പരീക്ഷകളില്‍ ഉപരിപഠനത്തിന് അര്‍ഹത നേടിയ കണക്ക്, സയന്‍സ്, ഇംഗ്ലീഷ് വിഷയങ്ങള്‍ ഓരോ വിഷയങ്ങളായി പഠിച്ചവര്‍ക്ക് എഞ്ചിനീയറിംഗ് സ്ട്രീമിലേക്കും (സ്ട്രീം ഒന്ന്) കണക്ക്, ഇംഗ്ലീഷ് എന്നിവ പഠിച്ചവര്‍ക്ക് നോണ്‍ എഞ്ചിനീയറിംഗ് സ്ട്രീമിലേക്കും (സ്ട്രീം രണ്ട്) അപേക്ഷിക്കാം.

കേരളത്തിലെ 45 ഗവണ്‍മെന്റ് പോളിടെക്‌നിക്കുകളിലെ മുഴുവന്‍ സീറ്റുകളിലേക്കും ആറ് എയ്ഡഡ് പോളിടെക്‌നിക്കുകളിലെ 85 ശതമാനം സീറ്റുകളിലേക്കും (ആകെ സീറ്റുകള്‍ – 11670) 22500 രൂപ വീതം ഫീസ് നല്‍കേണ്ട സ്വാശ്രയ പോളിടെക്‌നിക് കോളേജുകളിലെ ഗവണ്‍മെന്റ് സീറ്റുകളിലേക്കുമുളള (ആകെ സീറ്റുകള്‍ – 3055) പ്രവേശനമാണ് ഓണ്‍ലൈനായി നടക്കുക.

അപേക്ഷകര്‍ക്ക് സ്വന്തമായും അക്ഷയ സെന്ററുകള്‍ വഴിയും അപേക്ഷ തയ്യാറാക്കാം. അപേക്ഷ പോളിടെക്‌നിക്കുകളില്‍ പ്രവര്‍ത്തിക്കുന്ന ഹെല്‍പ്പ് ഡെസ്‌ക്കുകളില്‍ പരിശോധനയ്ക്ക് വിധേയമാക്കണം. ഇത്തരത്തില്‍ ഹാജരാക്കിയ അപേക്ഷ വെരിഫിക്കേഷന്‍ ഓഫീസറുടെ ഒപ്പ് നേടിയതിനുശേഷം മാത്രമേ ഫീസ് അടച്ച് രജിസ്റ്റര്‍ ചെയ്യാന്‍ അനുവദിക്കൂ. ഹെല്‍പ്പ് ഡെസ്‌ക്കുകളുടെ സഹായം എല്ലാ പോളിടെക്‌നിക് കോളേജുകളിലും ലഭ്യമാണെങ്കിലും ഫീസ് അടച്ച് അപേക്ഷ രജിസ്റ്റര്‍ ചെയ്യാനുള്ള സൗകര്യം ഗവണ്‍മെന്റ്/എയ്ഡഡ് പോളിടെക്‌നിക് കോളേജുകളില്‍ മാത്രമാണ്.

ടി.എച്ച്.എസ്.എല്‍.സി/ഐ.ടി.ഐ/കെ.ജി.സി.ഇ/വി.എച്ച്.എസ്.ഇ എന്നിവ പാസായവര്‍ക്ക് യഥാക്രമം 10, അഞ്ച്, രണ്ട് ശതമാനം വീതം റിസര്‍വേഷനുണ്ട്. ഐ.ടി.ഐ/കെ.ജി.സി.ഇ/വി.എച്ച്.എസ്.ഇ പാസായവര്‍ക്ക് അവരവരുടെ ട്രേഡുകള്‍ അനുസരിച്ചാണ് ബ്രാഞ്ചുകള്‍ തിരഞ്ഞെടുക്കാനാവുക.

ഭിന്നശേഷിയുള്ള സഞ്ചാരം, കാഴ്ച, കേള്‍വി എന്നിവയ്ക്ക് വൈകല്യമുള്ളവര്‍ക്ക് മൂന്ന് ശതമാനം സീറ്റുകള്‍ സംവരണം ചെയ്തിട്ടുണ്ട്. മാനസിക വൈകല്യമുള്ളവര്‍ക്ക് ഈ വിഭാഗത്തിലേക്ക് അപേക്ഷിക്കാനാവില്ല. വിശദവിവരം www.polyadmission.org യില്‍ ലഭിക്കും.