ഐസർ (IISER ) അഭിരുചി പരീക്ഷ: മേയ് 31ന്
ബിരുദതലത്തിലുള്ള വിദ്യാഭ്യാസത്തെ ഗവേഷണവുമായി ബന്ധപ്പെടുത്തി ശാസ്ത്ര ഗവേഷണത്തെ അന്താരാഷ്ട്ര നിലവാരത്തിലേക്ക് ഉയർത്തുകയാണ് ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യൂക്കേഷൻ ആൻഡ് റിസർച്ച് ( IISER – ഐസർ ) ൻറെ ലക്ഷ്യം.
ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യൂക്കേഷൻ ആൻഡ് റിസർച്ച് ( IISER – ഐസർ ) തിരുവനന്തപുരത്തു പ്രവർത്തനമാരംഭിക്കുന്നത് 2008 ൽ ആണ്‌. അന്താരാഷ്ട്ര നിലവാരത്തിലുള്ള ശാസ്ത്രവിദ്യാഭ്യാസവും ഗവേഷണവും നടത്തുന്നതിനുള്ള ഐസർ 2006-ൽ പൂനയിലാണ് ആദ്യമായി ആരംഭിക്കുന്നത്. തിരുവനന്തപുരത്തു വിതുരയിൽ പൊന്മുടിയുടെ താഴ്‌വരയിൽ പ്രവർത്തിക്കുന്ന ഐസർ പ്രകൃതി രമണീയമായ സ്ഥലത്താണെന്ന് മാത്രമല്ല, 1050 കുട്ടികൾക്കുള്ള ഹോസ്റ്റൽ സൗകര്യവും ഇവിടെയുണ്ട്.
ഉന്നത നിലവാരത്തിലുള്ള അടിസ്ഥാന ശാസ്ത്ര ഗവേഷണം ലക്ഷ്യമാക്കുന്ന ഈ ഇൻസ്റ്റിറ്റ്യൂട്ടുകൾ ബെർഹാംപൂർ, ഭോപ്പാൽ , കൊൽക്കത്ത, മൊഹാലി, പൂനെ , തിരുപ്പതി , തിരുവനന്തപുരം എന്നിവിടങ്ങളിൽ പ്രവർത്തിക്കുന്നു . മേയ് 31നാണ് അഭിരുചി പരീക്ഷ.
പ്ലസ്ടു പാസായ വിദ്യാർഥികൾക്കാണ് ഇവിടെ പ്രവേശനം നൽകുന്നത്. അഞ്ചുവർഷത്തെ കോഴ്സ് വിജയിക്കുന്നവർക്ക് ബിഎസ്എംഎസ് എന്ന ഇരട്ട ഡിഗ്രി ലഭിക്കുന്നു.
പ്രവേശനം :
മൂന്നു വിധത്തിലാണ് ഈ കോഴ്സുകളിലേക്ക് പ്രവേശനം നൽകുന്നത്.
1. കിശോർ വിജ്ഞാൻ പ്രോത്സാഹൻ യോജന (കെവിപിവൈ) പരീക്ഷ പാസാകുന്നവർ.
2. ഐഐടി അഡ്മിഷനുള്ള ജോയിന്റ് എൻട്രൻസ് എക്സാമിനേഷൻ (അഡ്വാൻസ്ഡ്) പാസാകുന്നവർ.
3. കേന്ദ്ര, സംസ്ഥാന ബോർഡുകളുടെ (സ്റ്റേറ്റ്, സെൻട്രൽ ബോർഡ്) പ്ലസ് ടു പരീക്ഷ പാസാകുന്ന ആദ്യത്തെ 20 ശതമാനം വിദ്യാർഥികൾ.
ഇവർക്ക് പ്രത്യേകമായി പ്രവേശന പരീക്ഷ നടത്തുന്നു.
ഗണിതം, ഊർജതന്ത്രം, രസതന്ത്രം, ജൈവശാസ്ത്രം എന്നിവ ചേർത്താണ് ഈ പരീക്ഷ നടത്തുന്നത്. പൂർണമായും കംപ്യൂട്ടർ അധിഷ്ഠിത പരീക്ഷയാണ്. ഇങ്ങനെ പ്രവേശിപ്പിക്കുന്ന വിദ്യാർഥികൾക്ക് കെവിപിവൈയുടേയും ഇൻസ്പയറിന്‍റെയും സ്കോളർഷിപ്പുകൾ നൽകുന്നുണ്ട്.
ഐസറിലേക്കുള്ള അഡ്മിഷന് ഓൺലൈനായി അപേക്ഷിക്കണം. 2019-ൽ പ്ലസ്ടു പാസായവർക്കും, 2020ൽ പ്ലസ്ടു പരീക്ഷ എഴുതുന്നവർക്കും അപേക്ഷിക്കാം. കെവിപിവൈ സ്കോളർഷിപ്പുകാർക്ക് ഏപ്രിൽ 24 മുതലും ജെഇഇ-അഡ്വാൻസ്ഡ് റാങ്ക് ലിസ്റ്റിൽപ്പെട്ടവരെ ജൂൺ ഒന്നു മുതലും അപേക്ഷിക്കാം.
ഗവേഷകനായി മാറാൻ:
ഗണിതം , ഊർജതന്ത്രം , രസതന്ത്രം , ജൈവശാസ്ത്രം എന്നിവ കൂടാതെ ഇന്‍റർ ഡിസിപ്ലിനറിയായ വിഷയങ്ങളും ഈ കോഴ്സിൽ പഠിപ്പിക്കുന്നു. ആദ്യത്തെ രണ്ടു വർഷം വിഷയങ്ങൾ എല്ലാം പഠിക്കണം. മൂന്നാമത്തെ വർഷം മുതൽ നാലു വിഷയങ്ങളിൽ ഏതെങ്കിലും ഒന്ന് മേജർ വിഷയമായി തെരഞ്ഞെടുക്കാം . ആ വിഷയങ്ങളായിരിക്കും കോർ കോഴ്സുകളായി മൂന്നും നാലും വർഷങ്ങളിൽ പഠിപ്പിക്കുന്നത്. അതു കൂടാതെ മറ്റു വിഷയങ്ങളിലെ കോഴ്സുകളിൽ കുറെയും തെരഞ്ഞെടുത്ത് പഠിക്കാം.
അഞ്ചാമത്തെ വർഷം മുഴുവൻസമയവും ഗവേഷണമാണ്. മേജർ വിഷയത്തിലെ ഏതെങ്കിലും ഒരു കാര്യത്തിൽ ഗവേഷണം നടത്തുകയും പ്രബന്ധം നൽകുകയും ചെയ്യണം. ആദ്യത്തെ രണ്ടു വർഷങ്ങളിൽ നാലു വിഷയങ്ങളും പഠിക്കുന്നത് ഗവേഷണത്തെ വളരെയധികം സഹായിക്കുന്നു. ഇന്‍റർ ഡിസിപ്ലിനറി വിഷയങ്ങളിലെ പഠനം ഗവേഷണം എളുപ്പമായി വരുന്നു. ഐസറിലെ പഠനം ഒരു നല്ല ഗവേഷകനായി മാറാൻ വിദ്യാർഥികളെ സഹായിക്കും.
പിഎച്ച്ഡിക്കും പ്രവേശനം:
ഇന്‍റഗ്രേറ്റഡ് പിഎച്ച്ഡി. പ്രോഗ്രാമിനും ഐസറിൽ പ്രവേശനം നൽകുന്നുണ്ട്. ബിഎസ്‌സി പാസായവർക്കും ബിടെക് പാസായവർക്കും ഇങ്ങനെ ഐസറിൽ ചേരാം. അവർക്ക് എംഎസ്. ബിരുദവും തുടർന്ന് പിഎച്ച്ഡിയും നേടാൻ സാധിക്കും.
സാധാരണ പിഎച്ച്ഡി പ്രോഗ്രാമും ഇവിടെ ഉണ്ട്. സിഎസ്ഐആർ, നെറ്റ് പരീക്ഷ പാസായവരും ഗേറ്റ് പാസായവരും ഇതിന് യോഗ്യരാണ്. കൂടാതെ ജെസ്റ്റ് (JEST) പാസായ എംഎസ്്‌സികാർക്കും, പിഎച്ച്ഡിക്കു ചേരാം. പിഎച്ച്ഡിക്കു കോഴ്സ്വർക്ക് നിർബന്ധമാണ്.
ഐസറിലെ എല്ലാ കോഴ്സുകളിൽ ചേരുന്നവരും നിർബന്ധമായി ഐസറിൽ തന്നെ താമസിക്കണം എന്ന് നിർബന്ധമുണ്ട്. 24 മണിക്കൂറും പഠനവുമായി ബന്ധപ്പെടുന്നതിനാലാണ് ഈ നിയമം. ഒഴിവുകാലത്ത് ഐസറിൽ തന്നെയോ മറ്റേതെങ്കിലും ഗവേഷണ സ്ഥാപനത്തിലോ പ്രോജക്ടുകൾ ചെയ്യാം. ഇതുവരെ ഐസറിൽ പഠിച്ചിറങ്ങിയവരിൽ ഭൂരിഭാഗവും ഗവേഷകരായി ഈ ഇൻസ്റ്റിറ്റ്യൂട്ടുകളിലും ഇന്ത്യയിലേയും വിദേശത്തേയും സ്ഥാപനങ്ങളിലും പ്രവർത്തിക്കുന്നുണ്ട്. മറ്റു ചിലർ അധ്യാപകരായും പ്രവർത്തി ക്കുന്നു.
അപേക്ഷ സമർപ്പിക്കേണ്ട അവസാന തിയതി : ഏപ്രിൽ 30
കൂടുതൽ വിവരങ്ങൾ : http://www.iiseradmission.in/ എന്ന വെബ് സൈറ്റിൽ ലഭിക്കും.
