അപ്രന്റീസ് ട്രെയ്‌നിങ്ങിന് 800 അവസരം
പോളിടെക്‌നിക് ഡിപ്ലോമ, ബി.ടെക്/ബി.ഇ യോഗ്യതയുള്ളവര്‍ക്ക്
സംസ്ഥാനത്തെ വിവിധ സര്‍ക്കാര്‍/പൊതുമേഖലാ/സ്വകാര്യ സ്ഥാപനങ്ങളില്‍ നിലവിലുള്ള ഒഴിവുകളിലേക്ക് ഗ്രാജുവേറ്റ്/ ടെക്‌നീഷ്യന്‍ അപ്രന്റീസുകളെ തെരഞ്ഞെടുക്കുന്നതിന് കേന്ദ്രസര്‍ക്കാരിന്റെ കീഴിലുള്ള ചെന്നൈയിലെ ദക്ഷിണ മേഖലാ ബോര്‍ഡ് ഓഫ് അപ്രന്റീസ്ഷിപ്പ് ട്രെയ്‌നിങ്ങും സാങ്കേതിക വിദ്യാഭ്യാസ വകുപ്പിന് കീഴിലുള്ള കളമശ്ശേരിയിലെ സൂപ്പര്‍വൈസറി ഡെവലപ്പ്‌മെന്റ് സെന്ററും സംയുക്തമായി കേന്ദ്രീകൃത വാക്-ഇന്‍-ഇന്‍ര്‍വ്യൂകള്‍ നടത്തും.
ഏകദേശം 800 ഒഴിവുകളാണ് പ്രതീക്ഷിക്കുന്നത്. കളമശ്ശേരി കുസാറ്റിലെ സ്‌കൂള്‍ ഓഫ് എഞ്ചിനീയറിംഗ്, സോഫ്റ്റ് വെയര്‍ എഞ്ചിനീയറിംഗ് ബ്ലോക്കില്‍ നവംബര്‍ 16നും 17നും രാവിലെ 8.30 മുതല്‍ ബി.ടെക്/ബി.ഇ കാര്‍ക്കായി വാക്ക്-ഇന്‍-ഇന്റര്‍വ്യൂ നടത്തും.
കൊല്ലം ബിഷപ്പ് ജെറോം ഇന്‍സ്റ്റിറ്റ്യൂട്ട് ആന്റ് സ്‌കൂള്‍ ഓഫ് മാനേജ്‌മെന്റില്‍ ഡിസംബര്‍ ഒന്നിന് രാവിലെ 8.30 ന് പോളിടെക്‌നിക് ഡിപ്ലോമക്കാര്‍ക്കും, ബി.ടെക്/ബി.ഇ ക്കാര്‍ക്കുമായി വാക്ക്-ഇന്‍-ഇന്റര്‍വ്യൂ നടത്തും.
എഞ്ചിനീയറിങ്ങ്/ടെക്‌നോളജിയില്‍ ബി.ടെക്/ബി.ഇ/പോളിടെക്‌നിക് ഡിപ്ലോമ നേടി മൂന്ന് വര്‍ഷം കഴിയാത്തവര്‍ക്കും അപ്രന്റീസ് ആക്ട് പ്രകാരം പരിശീലനം ലഭിക്കാത്തവര്‍ക്കും എസ്.ഡി സെന്ററില്‍ രജിസ്റ്റര്‍ ചെയ്ത ശേഷം (ഇതുവരെ ചെയ്യാത്തവര്‍) ഇന്റര്‍വ്യൂവില്‍ പങ്കെടുക്കാം.
ഡിഗ്രിക്കാര്‍ക്ക് 4984 രൂപയും, ഡിപ്ലോമക്കാര്‍ക്ക് 3542 രൂപയുമാണ് കുറഞ്ഞ പ്രതിമാസ സ്റ്റൈപന്റ്.
ട്രെയ്‌നിങ്ങിന് ശേഷം കേന്ദ്രസര്‍ക്കാര്‍ നല്‍കുന്ന പ്രൊഫിഷ്യന്‍സി സര്‍ട്ടിഫിക്കറ്റ് അഖിലേന്ത്യാതലത്തില്‍ തൊഴില്‍പരിചയമായി പരിഗണിച്ചിട്ടുണ്ട്. കൂടാതെ ട്രെയ്‌നിങ്ങ് കാലത്തുള്ള പ്രാവീണ്യം കണക്കിലെടുത്ത് പല സ്ഥാപനങ്ങളും സ്ഥിരം ജോലിക്കും അവസരമൊരുക്കും.
സര്‍ട്ടിഫിക്കറ്റുകളുടേയും മാര്‍ക്ക് ലിസ്റ്റുകളുടേയും അസലും മൂന്ന് കോപ്പികളും വിശദമായ ബയോഡാറ്റയുടെ മൂന്ന് കോപ്പികളും സഹിതം തെരഞ്ഞെടുപ്പ് കേന്ദ്രത്തില്‍ ഹാജരാകണം. സൂപ്പര്‍വൈസറി ഡവലപ്‌മെന്റ് സെന്ററില്‍ ഇതുവരെ രജിസ്റ്റര്‍ ചെയ്യാത്തവര്‍ ഇന്റര്‍വ്യൂ തീയതിയ്ക്ക് മുമ്പ് രജിസ്റ്റര്‍ ചെയ്യണം.
അപേക്ഷാ ഫോമും രജിസ്റ്റര്‍ ചെയ്യുന്നതിനുള്ള മാര്‍ഗ്ഗനിര്‍ദ്ദേശങ്ങളും www.sdcentre.org ല്‍ ലഭ്യമാണ്. രജിസ്റ്റര്‍ ചെയ്യുന്നതിന് പോസ്റ്റല്‍ വഴി അയയ്ക്കുകയോ കുട്ടികളോ, അദ്ധ്യാപകരോ മുന്‍കൈ എടുത്ത് അപേക്ഷകള്‍ ശേഖരിച്ച് നേരിട്ട് എസ്.ഡി സെന്ററില്‍ എത്തിക്കുകയോ ആവാം. കൊണ്ടുവരുന്ന വ്യക്തിയുടെ കൈവശം രജിസ്‌ട്രേഷന്‍ കാര്‍ഡുകള്‍ കൊടുത്തയക്കും. ഇന്റര്‍വ്യൂ നടക്കുന്ന ദിവസം രജിസ്‌ട്രേഷന്‍ ഉണ്ടായിരിക്കില്ല. എസ്.ഡി സെന്റര്‍ നല്‍കുന്ന രജിസ്‌ട്രേഷന്‍ കാര്‍ഡോ ഇ-മെയില്‍ പ്രിന്റോ ഇന്റര്‍വ്യൂവിന് വരുമ്പോള്‍ നിര്‍ബന്ധമായും കൊണ്ടുവരണം.
ബോര്‍ഡ് ഓഫ് അപ്രന്റീസ് ട്രെയ്‌നിംഗിന്റെ നാഷണല്‍ വെബ് പോര്‍ട്ടല്‍ ആയ www.mhrdnats.gov.in ല്‍ രജിസ്റ്റര്‍ ചെയ്തവര്‍ അതിന്റെ പ്രിന്റ് ഔട്ട് കൊണ്ടുവന്നാലും പരിഗണിക്കും.
പങ്കെടുക്കുന്ന കമ്പനികളുടേയും ഒഴിവുകളുടേയും വിവരങ്ങള്‍ www.sdcentre.org ല്‍ പ്രസിദ്ധീകരിക്കും. ഒഴിവുകള്‍ റിപ്പോര്‍ട്ട് ചെയ്ത ബ്രാഞ്ചുകള്‍ക്ക് മാത്രമേ ഇന്റര്‍വ്യൂകള്‍ ഉണ്ടായിരിക്കൂ.
